हिजो रोटर्याक्ट क्लब अफ काठमान्डू मिड टाउनले गरेको ‘ऊ कस्को‘ भन्ने नाटकको charity show हेरियो। शंकर लामिछानेको ‘ऊ कसको हो?’ कथालाई नाटकमा राम्रोसंग प्रस्तुत गरिएको छ। यदि फरक खाले नाटक हेर्न मन छ अथवा सामान्य भाषामा भन्नु पर्दा अलि हट्के नाटकको लागि ऊ कस्को भन्ने प्रस्तुति हेर्नै पर्छ। प्रस्तुत छ ऊ कस्को हेर्नु पर्ने ५ कारणहरु:
१. निकै रोचक कथा:
कुनै पनि नाटक राम्रो हुन त्यसको कथा-बस्तु राम्रो हुनुपर्छ। शंकर लामिछानेको ससक्त लेखमा आधारित यो लेखले मजाको बिषयवस्तुलाइ आधार मानेर कथा अगाडी बढाएको छ। कल्पना गर्न पनि नसकिने एउटा मान्छेको मस्तिस्कलाइ अर्को मानिसको शरीरमा लगेर जोडिन्छ अनि सुरु हुन्छ कथा। यस नाटकमा विभिन्न पक्षको विवाद र द्वन्द हेर्न पाइन्छ जस्तै ज्ञान कि विज्ञान, शारीरिक प्रेम कि अनन्त प्रेम, यसरी नै यी सबैको लडाइ बीचमा फसेका चरित्रहरूको राम्रो वर्णन गरेको छ ऊ कस्को ले। समग्रमा कथा राम्रो छ अनि हेरुनजेल मजा नै आउंछ, कतै भावुक बनाउंदै धेरै हँसाउन पनि भ्याउंछन् कलाकारहरु।
२. राम्रो अभिनय हेर्ने मौका:
म कलाकारिता क्षेत्रको मान्छे हैन, सामान्य दर्शक हुँ र दर्शकले नै कलाकारको मुल्यांकन गर्छन भने यो नाटकमा उत्कृस्ट अभिनय हेर्ने मौका पाइने छ। प्रत्यक्ष प्रदर्शनको बेग्लै मज्जा हुन्छ तर अभिनय गर्नेलाई भने त्यस्तै कठिन, सिनेमामा जस्तो RE-TAKE हुँदैन तेइपनि सिनेमा भन्दा कुनै कुराले पनि कम छैन यो नाटक। धेरै कलाकारले मन जित्ने छन् तपाईंको, अहिले कसैको नाम नभन – नाटक हेर्नु होला ति चरित्र जान्नको लागि। हाम्रो उपस्थितिले कलाकारलाई हौसला पनि मिल्ने छ।
३. हाम्रो सामाजिक चित्रण:
माथि भनि सकेको छु कथाको सुरुवात, एउटा मान्छेको मस्तिस्क अर्को मान्छेको शरीरमा – सुन्दै पत्याउन गाह्रो, पत्याए पनि स्वीकार्न गाह्रो। हो धेरै हदसम्म हाम्रो समाज अपरम्परागत र नयाँ सोच र खोजलाई खासै मान्यता दिने चलन छैन। कुनै भिन्न कुरा अपनाउन निकै समय लाग्छ, हो नाटकले यो कुरा पनि प्रस्ट पारेको छ, हामी स्थिर हुनुको कारण, यथा-स्तिथिमा भइ राख्नु पछाडीको कारण पनि केलाएको छ। त्यहाँ भएको बहस र निर्णयले हाम्रो सामाजिक अवस्था उजागर गरे जस्तो लाग्छ र अवस्य पनि हामी प्रगतिशिल हुन प्रोत्साहन गर्छ।
४. ‘ऊ कस्को‘ भनेर थाहा पाउन:
नाटक हेर्दै गर्दा तपाईंको दिमाग सोचमग्न हुनेछ ऊ कस्को भनेर, नाटकमा जसरी ऊ कसको भन्ने बहस चल्छ, हाम्रो दिमागमा पनि ऊ कस्को भन्ने कुरा खेली नै रहने छ। यहाँ ऊ भनेको गौतम सुब्बा भन्ने पात्र हुन्, निकै राम्रो संग कथालाई प्रस्तुत गरिएको हुँदा नाटक सकिंदा ऊ कसको त भन्ने प्रश्न उठी राख्ने छ त्यसैले जानुहोस् नाटक हेर्न अनि निर्णय गर्न सहयोग गर्नुस ऊ कसको भनेर। तपाईंको सहभागिताको खाँचो छ यो निर्णय गर्नलाई।
५. शंकर लामिछानेलाई नाटकमा हेर्न:
प्राय नाटकहरु विदेशी लेखकहरुको लिने गरेको पाइन्छ, यो नाटक नेपाली साहित्यकारले आज भन्दा ४० – ५० वर्ष अगाडी नै परिकल्पना गरेका थिए र शब्दमा उतारेका पनि थिए। यो पल्ट निर्माता, निर्देशक र कलाकारहरुले यस्तो कथा लिएर नेपाली नाटकमा थप उर्जा पैदा गर्ने काम गरेका छन् र देखाएका छन् नेपाली कृतिहरु राम्रा छन् नाटकका लागि। यस्ता कयौं कृतिहरु छन् जसले यस्तै अवसर पाउने छन्। तसर्थ शंकर लामिछानेको बारेमा जान्न र उनलाई मंन्चमा हेर्न यो नाटक हेर्न जरुरी छ।
समग्रमा नाटक धेरै राम्रो तरिकाले चित्रण गरिएको छ, नाटक हेरी राख्नेहरु त अवस्य जानु हुनेछ तर अहिले सम्म नाटकघर गएर नाटक हेर्नु भएको छैन भने यो नाटकबाट सुरुवात गर्नुस्, तपाईं निराश हुनुहुने छैन। यति भन्दै विजय बराल उर्फ कबड्डी कबड्डीको बि.के दाइ संग पनि भेट हुने सम्भावना हुन्छ त्यसैले यो मौका पनि नछुटाउनुस्। अन्तमा प्रविण खतिवडा र गोबिन्द पराजुलीलाई धन्यबाद यो प्रस्तुतिको लागि र बिजु महर्जनलाई धन्यबाद तस्विरको लागि।
अरु जानकारी:
नाटकको शिर्षक: ‘ऊ कस्काे’
मिति : बैशाख २६ गते सम्म प्रदर्शन हुँदै छ तर साेमबार नजानु होला।
समय : ५:१५ बजे
स्थान: मण्डला नाटकघर, अनामनगर
शनिबार भने १ र ५:१५ बजे देखाइने छ यो नाटक त्यसैले मिलाएर जानु होला।